Форум » Согласия приемлющие священство » новосоставленная служба святителю Амбросию » Ответить
новосоставленная служба святителю Амбросию
о. Глеб Бобков: Выкладываю для обсуждения новосоставленную службу святителю Амбросию Месяца октября в тридцатыи день, память иже во святых отца нашего исповедника Амвросия, митрополита Белокриницкаго. [more]Тропарь, глас осьмыи. И нравом причастник, и престолом наместник, подобник апостолом быв, деянием обрете богодухновенне боговидения восход. И слово истины исправляя, за правую веру пострадал еси в заточении, святителю Амвросие, Христа Бога моли даровати нам велию милость. Кондак, глас третии. Пастырю истинныи, и исповедниче Амвросие прехвальне, обрете истину, и добре исполни служение свое, и пострада честно. Сего ради освятися и явися пресветлыи служитель Христова евангелия. На малей вечерни поставим стихеры на четыре. Глас первыи, подобен Прехвальнии мученицы. Преподобне отче, * исправлении твоими,* церковь украсил еси * и веру соблюл еси * и пострада за стадо свое ссылаем * и ныне о чтущих тя * Христови молися * даровати душам нашим * мир и велию милость. (дважды). Радуются в памяти твоей * собори верных * усердно сошедшеся * к честней раце мощей твоих * и благодарения возсылают Святей Троице* ей же ныне предстоя* усердно молися* даровати душам нашим * мир и велию милость. Архиереом удобрение * исповедником слава * учение православное * и древлее благочестие приемыи * и соблюд непоколебимо* и ныне о чтущих тя * Христови молися * даровати душам нашим * мир и велию милость. Слава, глас шестыи. На прославление твое святителю Амбросие, усердно стекшеся вернии, от конец всея земли, молим тя исповедниче Христов, не забуди совершающих память твою. И ныне, глас тойже. Богородице Ты еси лоза истинная, возрастившая нам плод животныи, молися Владычице со святителем, помиловатися душам нашим. На стиховне. Глас вторыи, подобен Доме Ефрафов. Пастыря дивна, * поборника православию * похвалим вернии, * любовию блажаще * Амбросия чуднаго . Уста моя возглаголют премудрость, и поучение сердца моего разум. Вселение Духа * Святаго был еси * исповедниче честныи * архиерею истиный * и пастырь добрыи. Священницы твои облекутся в правду, и преподобнии твои возрадуются. Столпе истины * премудре Амвросие, * и мира церковнаго * твердое основание, * ублажаем тя. Слава, подобен тойже. Последова истине * яко же ти повеле, * Никола дивныи, * и сему подобник бысть * досточудне. И ныне, подобен тойже. Нарицается имя, * Сына твоего Владычице * великаго совета Ангела* Вседержителя, * Его же моли со святителем. На велицей вечерни поставим стихеры на осьмь. Глас первыи, подобен небесным чином. Небесным чином радование, * и на земли человеком веселие, * память крепкаго исповедника, * и добраго пастыря и учителя, * иже всегда упование, * на Христа Бога возлагавшаго. (трижды). Да восхвалим днесь вернии, * в честное торжество, * богоноснаго отца нашего Амвросия, * молитбося ныне, * о иже верою приходящих, * к честней раце мощей его. (трижды). Верных совокупления, * стекшеся усердно * похвалим честными пении * возлюбившаго Христову истину * и право упасшаго * стадо верных Его овец. (дважды). Слава, глас вторыи. Богоприятне Амвросие, честно путь спасенныи совершил еси, Христа возлюбив, и верное его стадо словесных овец, упасл еси, и ныне молися прилежно Святей Троице, о мире и о людех. И ныне, глас тойже. Прейде сень законная. Прокимен дню, и чтения святительские. На литии стихеры, глас 5. Архиерею преподобныи Амбросие, истинныи хранителю православия, поборник древняго благочестия, основание церковное, апостолом подражателю, любовию ныне ублажаем тя, исповедниче честныи. Имея душу милостиву, и кроткое смирение, и терпение в напастех, и скорбех и в болезнех, изволи страдати в заточении, неже во временней чести и славе быти, и ныне поминай нас, бодрыми твоими молитвами. Малое православия стадо, восприял еси честно, укрепляем силою Святаго Духа, архиерею милостиве, и пострада от нечестива царя, избрав заточение, и воистину достоин, прияти венец на небесех, от Христа Бога и Спаса нашего. Слава, глас седьмыи. Приидите благодарение принесем Господеви, даровавшаго нам предобраго пастыря, пастырем единоревнителя, христианом доброе наставление, и молитвенника о нас ко Господу. И ныне, богородичен вторыи седьмого гласа. На стиховне стихеры глас 4, подобен Иже званныи свыше. Иже званныи свыше быв, * купно и от человек, * егда пресвятыи Николае, * рече тебе в видении, * подобает прияти стадо верных, * и пострадати честно, * тогда отверзе тебе духовнии очи Христос Бог наш, * его же моли, * спасти и просветити душа наша. Уста моя возглаголют премудрость, и поучение сердца моего разум. Иже просвещенныи благочестием, * и огнем истинныя веры, * егда гонители реша ти, * остави малое се стадо, * и приими почести, * избрал еси пострадати, * и сохранити веру православную, * тем же тебе дарова венец Христос Бог, * его же моли, * спасти и просветити душа наша. Священницы твои облекутся в правду, и преподобнии твои возрадуются. Иже воистину пастырь быв, * и поборник мира церковнаго, * умоляше раздорствующих, * отложити гордыню * и возлюбити смирение *и воистину примиритися* и взыскати любовь друг ко другу, * яко же глагола Христос Бог наш,* Его же моли, * спасти и просветити душа наша. Слава, глас осьмыи. Преподобне отче, святителю Амбросие, приносимое нами грешными, смиренное ти моление, и твоих трудов похваление, не презри, но приими тепле, и помолися о нас ко Святей Троице. И ныне, глас тойже. Безневестная дево. Тропарь, глас 8. И нравом причастник, и престолом наместник, подобник апостолом быв, деянием обрете богодухновенне боговидения восход. И слово истины исправляя, за правую веру пострадал еси в заточении, святителю Амвросие, Христа Бога моли даровати нам велию милость. По первой стихологии, седален, глас 2. Веру истинно соблюл еси, и течение совершил еси, блаженне Амвросие, и ныне купно со ангелы моляся Вседержителю, поминай нас, чад твоих, верно сотворяющих память твою. (дважды). Слава, и ныне. О всепетая Мати Божия, посети наши немощи и болезни, и спаси ны от враг видимых и невидимых, к Тебе бо прибегаем раби твои, милосердая Владычице. По второй стихологии, седален, глас 6. Светильника светлаго, пастыря истиннаго, Амвросия премудраго память сотворяюще, благодарение приносим Святей Троице и глаголем, молитвами святителя очисти согрешения наша.(дважды). Слава, и ныне. Милосердия двери отверзи нам, благословенная Богородице Дево, надеющеся на Тя не погибнем, но да избавимся Тобою от бед, Ты бо еси спасение роду христианскому. По полиелеосе седален, глас 1. Пресветлыи день памяти Амбросия предивнаго наста, вернии добре подвигнемся на молитву и пощение, и благодарственно возопием: слава прославльшему тя, слава умудрившему тя, слава свободившему нас от работы вражия. Слава, и ныне. Девая и Мати, покров и помощь, молитвенница и заступница, стена и прибежище, упование христианом, молися о нас грешных, со слезами прибегающих к Твоему заступлению. Прокимен псалом Давыдов. Уста моя возглаголют премудрость, и поучение сердца моего разум. В церквах благословите Бога Господа от источник израилев. Евангелие от Иоанна, зачало 36. По пятидесятом псалме стихера, глас 6. Преподобне треблаженне святейшии отче, пастырю добрыи, не отвержеся истинного православия, и стадо словесных овец добре паствил еси, и ныне поминай нас твоими молитвами, Амвросие блаженне. Канон, глас 3. Песнь 1, ирмос. Песнь нову воспоем людие, от Девы рождьшемуся на спасение наше, и совокупльшему с небесными земная, яко прославися. Запев. Святителю Христов Амвросие, моли Бога о нас. Собори верных ныне совокупльшеся, от Девы рождьшемуся благодарение принесем, даровавшему нам пастыря премудра Амбросия, яко прославися. Запев. Вдовая иногда, ныне веселися Христова церкви, в память треблаженнаго пастыря нашего Амбросия, истину возлюбившаго. Запев. Да похвалят языцы и людие, подобника и подражателя Христова, терпеливно изгнание понесшаго, и исповедание православия житием совершившаго. Богородичен. Песнь похвальну от сердца, православниии собори, ныне принесем Божии Матери, молитбося о нас непрестанно ко Господу. Песнь 3. Ирмос. Утверди мене Господи, Едине Многомилостиве, и простри ми руку яко Петрови, и спаси мя. Запев. Святителю предивне Амвросие, услыши наша смиреныя молитвы, и простри крепкую руку си помощи, и спаси нас. Запев. Милостиве и досточюдне пастырю, твоими теплыми к Богу молитвами, утверди неколеблемо православие,и спаси нас. Запев. Веры истинныя блюстителю, подаждь нам помощь, еже хранити свято и твердо церковное предание и отеческия уставы. Богородичен. Матерь Божию Тя вси и Деву, вернии потщимся, достойно славословити, да прострет нам руку помощи. Седален, глас четвертыи. Днесь вернии, память сотворяюще светильника правыя веры, благодарение приносим Святей Троице, и глаголем, Отче преблагии, простри нам руку помощи, Сыне Всещедре, прости наша согрешения, Душе Правыи, направи стопы наша на путь смирения. Дважды. Слава и ныне. Богородичен. Днесь Ти припадаем, милостивая Мати Божия, и умильно молящеся глаголем, возвыси рог православных, и утверди непоколеблемо, церковь Сына Твоего и Бога нашего. Песнь 4, ирмос. Услышав слух твой и убояхся, разумех дела твоя и дивихся, яко Бог сыи превечныи от Девы рождься, быв убо человек. Запев. Подобник апостолом быв, твердую любовь стяжа к Богу, и заповеди Христовы исполни верно, и ныне молися о нас, православно восхваляющих тя. Запев. Всяк верныи да дивится, разумевая благодать божию, ею же Амвросии пречестныи, приведеся к древлему благочестию. Запев. В сердце си преблаженне, имея благодать и страх божии, ныне и нас настави творити и соблюдати Христовы заповеди. Богородичен. Услышах слух неизреченнаго ти Дево рожества, и дивяся несказанному Божию милосердию, всяк верныи спасается, прибегая к твоей помощи Всепетая. Песнь Пятая. Ирмос. Твой мир даждь нам, Сыне Божии, иного бо разве тебе Бога не знаем, в вышних со Отцем и Духом славимыи. Запев. От напастей греховных и бед, преблаженне Амбросие, сохраняй и соблюдай присно своим предстательством, чтущих память твою. Запев. Святителю преблаженне, молитвами твоими утверди нас, славити верно Пресвятую Троицу, ей же ныне в вышних предстоиши. Богородичен. Мати святая пресвятаго Господа, всеблаженная Марие, не остави нас грешных и окаянных, прибегающих к покрову твоему. Песнь Шестая. Ирмос. Глубина страстей восста на мя, и буря противных ми ветров. Но предварив мя спаси Спасе, и изми из тли, яко же спасе от зверя пророка. Запев. Глубина искушений и страстей, зле обуревает мя, но вопию ти Христе, спаси мя, молитвами святителя твоего, пречестнаго Амвросия. Запев. Страсти душетленныя, и сомнения бесовские, на ны бурею воссташа, но заступлением исповедника твоего Амвросия, Христе Боже, спаси нас. Запев. Исповедниче Христов преблаженне Амвросие, сохраняй присно своим предстательством, и святыми твоими молитвами, стадо словесных овец, еже добре паствил еси. Богородичен. Богородительнице Чистая, всесвятая Мати Господа нашего, сохрани нас грешных и окаянных, от всяких искушений и страстей бесовских, да Тя славим во веки. Кондак, глас третии. Пастырю истинныи, и исповедниче прехвальне, обрете истину, и добре исполни служение свое, и пострада доблественне. Сего ради освятися и явися пресветлыи служитель Христова евангелия. Икос. Воспоем ныне Амбросия прехвальнаго, православным людем пастыря и учителя, да молитвами его укрепимся во истинней вере. Сей бо прият истину Христову чистым сердцем, и остави вся, и прият малое стадо правоверных, и пострада в заточении содержимь, и тамо преставися ко Христу, и правым исповеданием освятися и явися пресветлыи служитель Христова евангелия. Песнь Седьмая. Ирмос. Трие отроцы в пещи Троицу прообразиша, прещение огненное поправше, и хваляще пояху, благословен еси Господи, Боже отец наших. Запев. Амвросие премудре, исповеданием твоим ты бысть Святей Троице жертва чиста и благоприятна, и взываеши ныне, благословен еси Господи, Боже отец наших. Запев. Чистым сердцем прият блаженне правду Христову, и апостольское православие, и взываеши присно, благословен еси Господи, Боже отец наших. Троичен. Прославим вернии Святую Троицу, давшую верным утешение в скорби, пресветлаго Амбросия, и возопием усердно от сердца, благословен еси Господи, Боже отец наших. Богородичен. Прославим вернии необоримую стену и твердое заступление, преблаженную Богородицу, и возопием присно, благословен еси Господи, Боже отец наших. Песнь Осьмая. Ирмос. Вещественнаго огня пламень невещественным угасиша, божественнии отроцы пояху, благословите всякая дела Господня Господа. Запев. Невещественныи пламень искушений, и нападания бесовская отрини молитвами твоими от призывающих тя, святителю Амвросие, взывая присно, благословите всякая дела Господня Господа. Запев. Угасил еси отче, пламень страстей своих, и весь повину себе Христу, ему же поеши присно, благословите всякая дела Господня Господа. Троичен. О Троице святая, Отче и Сыне и Душе Святыи, настави нас на стези спасения и сподоби Тебе пети и взывати присно благословите всякая дела Господня Господа. Богородичен. О Мати Божия, Марие пресвятая, вразуми нас грешных, со слезами припадающих Ти и сподоби чистым седцем пети присно, благословите всякая дела Господня Господа. Песнь Девятая. Ирмос. Тебе неопалимую купину и святую Деву, матерь сущую Света и Богородицу, надежду всех нас величаем. Запев. Тя премудраго учителя и вернаго наставника, поборника отеческаго православия и предстателя за люди согрешшия ко Христу, верно ублажаем. Запев. Тя исповедника честнаго и правило благочестия, верно похваляем и молим, непрестанно молися Христу о стаде своем. Троичен. О, Отче и Сыне и Душе Святыи, Троице Святая, сохрани нас от всякаго греха, молитвами угодника твоего, пречуднаго Амбросия. Богородичен. Милостивая верным заступнице, святая Дево, сохрани стадо Сына твоего, от всяких навет вражиих, молитвами угодника твоего, святителя Амбросия. Светилен. Подобен посетил ны есть. Избравыи апостольскую веру, святе Амвросие, и прият древлее благочестие, и возстави тобою Господь, православных соборы. Богородичен. Припадаем ти, Мати Божия пречистая, и молебно просим, возвыси рог православных, и спаси нас. На хвалитех стихеры поставим на четыре, глас осьмыи. Благодарения песнь, и достойное похваление, Тебе Христе приносим, да изволиши помиловати нас, молитвами святителя Амвросия. (дважды). Достоблаженне отче, твердое веры исповедание, принесе Христови, и молишися ныне, о стаде его верных овец, сотворяющих память твою. Собори верных, усердно стекшеся, достойно восхвалим память святителя, ревнителя истины, и поборника православия, преблаженнаго Амвросия. Слава, глас вторыи. Память праведника сотворяюще честно, восхвалим достойно подвиги и труды и болезни, пресветлаго исповедника, достоблаженнаго Амбросия, избравшаго древлее благочестие и апостольскую истину, и честно сохраньшаго избранное Христово стадо, и ныне предстоящего Христови, моляся о всех нас. И ныне, глас тойже. Все упование к тебе возлагаю, Мати Божия, сохрани мя во своем си крове. [/more]
Ответов - 1
Павел: определитесь в написании.. АмБросие или АмВросие
полная версия страницы