Форум » Книжница » Геронтий Соловецкий. Яко со испытанием подобает Божественая писания проходити. » Ответить
Геронтий Соловецкий. Яко со испытанием подобает Божественая писания проходити.
САП: [more]Предисловие о почитании святых книг, и яко со испытанием и истинным разумом подобает Божественая писания комуждо проходити, а не от своего смысла сказовати и разсуждати. [Предисловие «Ответа вкратце Соловецкого монастыря к востязующим нас, чесо ради не оставляем истинныя своея благочестивыя веры», инока Геронтия Соловецкого]. Благо убо есть и зело полезно, еже поучатися нам в Божественых писании, понеже всяко Писание, по апостолу, богодохновенно и полезно есть еже ко спасению, да совершен будет Божий человек. Писание же, глаголет святый Никон, не яже от своего смысла кому сказовати и составляти словеса, но сказанная святыми отцы. Писания подобает преписывати и чести на ползу слышащим. И елижды бо Писанием беседуеши Богови, толижды освящаетъ ти ся душа, и тело, и ум, занеже Духу Святому глаголющу ими. И «Якоже алчюще желаем ясти, и жаждуще желаем пити, тако подобает нам желание имети слышати слово Божие, понеже несть мощно кому спастися». Глаголет божественый Златоуст: «Аще нечасто прочитания наслаждающуся духовного, ибо велие утвержение, коеже не согрешати Писании прочитание и велия стремнина и пропасть глубока — Писанием неведение». Без того бо невозможно убежата сетей неприязненых. И якоже дарова Бог на диявола честный крест, тако и на сети его помощь — святыя книги, яже обнажают его всю неприязненую лесть разстворением и силою, яже в них Святаго Духа. Без того бо ни едино писмя составляется, но вся разделяет един Дух комуждо, якоже хощет. А иже не имея и книг, подобен есть оплоту, иже без подпор стояшу, аще ветр тхнет, то падется. Тако и мудруяй не книжник: пахнувшу нань ветру греховному, спадет во отчаяние, не имый подпора книжных словес. И паки той же глаголет яко: «Мнози непочитанием Божественых писаний с праваго пути совратишася и заблудивше, погибоша». Инии же, книги почитающе, разума же благодати свыше сходяща не имуще, с праваго пути совратишась, инии же разум благодати свыше сходящь имуще, самовольством от истины отпадоша. Богу попустившу величания ради их, занеже приемше от Бога разум, не восхотеша воли Его творити. Того ради пусти им Бог пути лукавы, лукавым бо пути лукавы посылает Бог. Сего ради блюдемся от сетей неприязненых, да не теми же пути различными с праваго пути совратимся и погубим труды своя и спасение, многи бо суть козни лукаваго, ими же уловляет человеки в погибель, и многих убо прелстил есть злый он и проныривый, не точию простыя, но и святители. И паки глаголет Златоуст: «Нецыи безумнии и ленивейшии глаголют, яко всяка душа проста благословена есть и ходяй, просто ходит во уповании» (Грамматика, лист 36). Се убо всем злобам вина есть, яко ниже свидетелства Писанием, к потребе ведят мнози приводити не неразумнаго. Бо зде глаголет: «Всяка душа проста благословена есть» (Никон, слово 2). Ниже паки неведящаго что, но не лукаваго, и не злодея неразумнаго. Елма аще убо сице бы было, из лиха бе, еже глаголати: «Будите мудри, яко змия, и цели, яко голубие». И еже готови бываете во ответ всякому вопрошающему вы слова о вашем уповании, и слово Христово да вселяется в вас богатно. Друзии же паки не хотяще испытовати Божественых писаний и разумевати воли Божии, неведения паче непщевание имут, безсловесне приимати Божественое слово, глаголющее: «Ведый раб волю господина своего и не сотворив, биен будет много. Не ведый же, и сотворив достойная ранам, биен будет мало» (Лука 68; Лествица печ[атная], лист 280, слово 30). Се Великий Василий сказует, яко ведом есть таковый, воображая неведение, неизбежно имать греховное осуждение. «Аще не бых, убо пришел — рече Господь — и глаголал, им греха не быша имели, ныне же вины не имут о гресе своем». Божественая убо Писания повсюду всем волю Божию возвещающе. Таковыи не с неведящими менее осудится, но со онеми паче зелне ище осуждается. О них же Писание глаголет: «Яко аспид глухий затыкаяй уши свои, еже не слышати гласа обоявающих обоваема, обовается от премудра». Инии же во всяцем разуме, християнъству противящеся, глаголют, яко лишнее осуждение нечто творят, иже разумы некия ишуще в Божественых писаниих, яко ничьтоже ино ищет Бог от християнина, точию дела добрая. И яко благо есть паче просто комуждо ходити и ни единого учения разумных вещей испытовати. «Да отступит убо от нас прелесть сия Христовою благодатию» — глаголет святый Иван Дамаскин. И смиреным и сокрушеным сердцем испытуем Божественая писания, во еже уведети нам от них волю Божию и разделити истину от прелести. И паки божественый Златоуст глаголет: «Поставленый убо на строителство слова и не брегий, яко убийца судится». Занеже глаголет Бог Иезекиилем пророком, яко: «Аще мечю приходящу, аще не потрубит страж людем, ниже знамение даст, и пришедшу мечю, повредит душа. Та убо за беззакония своя ята бысть, кровь же ея из руки стражника взыщут» (Глава 33, 34). Сего ради должни убо есмы вси, наипаче же иже строителству слова ввереннии, поучатися присно Божественых писаний и воздвизати себе же и друг друга на воспоминание заповедей Господних, на извещение истиннаго благочестия, «понеже ныне мнози Божественая писания накриво сказующе» (Кир[илова] 54 на об.), к своему разуму прехищряют любопрителне же, паче во мнозе от опасных и непорочных церковных закон пременяюще, в ново утвержают. О них же повсюду Писания велегласно к нам в церквах Божиих сказующе вопиют яко: «В последняя времена востати имут от вас самех мужие глаголгоще развращенная, отделяюще себе от единости веры, ими же путь истинный похулится и в преумножении льстивых и мудрых словес многих уловят, им же последовати имут мнози» (Деяния 44, Июда 78, Петр 66). Тем же потщимся убо присно Божественому писанию внимати, да навыкнем от сего, како подобает «ловления противнаго убежати» (Апостол, 254). И идеже бо аще божественыя книги обретаем, не в доброту письмен точию сматряем, но яко да от них плод некий приобрящем. Аще бо и худы образом негде будут, полезен же имут разум и нерастлевающь богоносных отец поучения, сия убо с радостию приемлем. Аще ли же некия книги в беседах растлиты будут, аще и доброту писмен и украшение имут, сих зелне отвращаемся и отреваем. Егда же седяшу ти на почитании словес Божиих или иного чтуща послушати хощеши, то помолися Богу со умилением, якоже учит святый Ефрем, сице глаголя: «Господи Исусе Христе, отверзи ми уши и очи серьдечнии услышати слово Твое и разумети его, и творити волю Твою, яко пришлец есмь аз на земли, не скрый от мене заповедей Твоих, но открый очи мои и увем чюдеса от закона Твоего, на Тя бо уповаю, Боже мой, да Ты ми просветиши сердце мое» (Слово 99). И тако прочитай словеса со многим прилежанием, и не тщися токмо листы обращати, но аще ти есть требе, то не ленися двократы и трикраты прочитать словеса, да разумееши силу их, да не во грех себе святых отец жития и словеса прочитаем, но на спасение и на успех душевный. Разумно же и о сем да будет, яко подобает искус имущим Божественых писаний, яже от учитель глаголемая или в Писаниих лежащая словеса со искушением приимати, якоже и апостол глаголет: «Вся искушающе — рече — доброе содержите», и согласная убо Писанием, по Василию Великому, приимати, несогъласная же отметати, не истязовающе убо глаголющих или пишущих, каков кто любо да есть, но смотрети и разсуждати силу пишемых и глаголемых. И аще согласна суть в законеных Божественым писанием — приимати и слушати и покорятися, аще ли же ни, то всячески отвращатися и отбегати. Сего бо ради и святии богоноснии отцы реша, яко не просто, но и зело люботрудне Божественая писания прочитати повелеша и упражнятися в них бдением, и молитвами, и постом. От них же и сия предлежащая Собрания ко утвержению своему и всем, яже о Христе верным написахом, яко да онех святых и божественых книг, воображеными тамо свидетелствы, получим истинный разум благодатию Христовою, яко тому слава во веки веком. Аминь. http://starajavera.narod.ru/GerontiyPredislovie.html [/more]
Ответов - 0
полная версия страницы