Форум » Книжница » Спиридон Потемкин. Слово Прение двух христиан. » Ответить
Спиридон Потемкин. Слово Прение двух христиан.
САП: [more] Прение о двух христианех, списано сице. Суди Боже, и разсуди прю сию, Богом наставляем. Два некая христианина, прение сотвориста между собою, о словеси святаго великаго Василия. Иже глаголет: креститися подобает яко прияхом, а веровати яко крестихомся. Глаголет: Кольми велико есть слово Василиево? Отвещает: Яко по величеству словес Васильевых, сподоби его Бог нарицатися Великим. Рече: Понеже по словеси святаго Василия, от крещения вера в нас составится, то како нецыи, и како крещени суть, а инако веруют? Рече, како и коим образом рцы ми. Рече: Понеже символ святыя веры три краты глаголется от лица крещаемаго без истиннаго, то како может веровати во Истиннаго, по словеси святаго Василия. Рече: И то како бысть что согрешает глаголя? по крещении, верую во единаго Бога без Истиннаго. Рече: Ты сам рекл еси, яко того ради великий нарицается. яко слово его велико есть пред Богом. То почто словес его отметаешися, не тако веруя якоже рекл еси. Рече: Бог сия обоя тако приемлет яко мы глаголем. А Василиево слово лежит в книгах, а мы последуем ныне сущим началником. Рече: Понеже апостол рече [ко евреом]: Повинуйтеся наставником вашим, иже глаголаша вам слово Божие, на них взирающе и на скончание жительства их, подражающе веру их. Исус Христос вчера и днесь тойже и вовеки. То како глаголеши слово его небрегомо есть в книгах. Рече: Аз не глаголю яко Васильево слово небрегомо есть в книгах. Но аз повинуюся началником ныне сущим, той сан на себе носят, якоже и Василий Великий. И тии ответ дадут за нас Богу, а мы послушницы, приемлем бо еже они предают нам. Рече: Сия глаголя, себе досаждаеши, и более почитаеши своих началников, нежели молишися за них. еже бо глаголеши яко они ответ дадут Богу за нас. То слово клятвы, а не благословение, зане всячески свое бремя понесет. Аще стоим за слово Божие, то умрети за сие должны есмы. а чего не приимати, от того и отвращатися подобает. Рече: Свято глаголеши, и на небесех слышит, но у нас еще аще и дух бодр, но плоть немощна. Видим что бысть прочим не хотящим повиноватися. А мы того боимся. Рече: О горе нам, Христос глаголет, не убойтеся от убивающих тело, а мы боимся; тамо, идеже не мучат еще нас. Рече: Сладце бых претерпел мучение, нежели изгнание, подобитися тотарскому полону, искусивый вся весть, доволно оправдихомся пред тобою, но не пред Богом. Рече: Рцы ми како на суде станем пред Христом, со своею верою, и коею совестию, и коею правдою? Рече: То слово мене и сокрушает, еже Божия ради страха держу истину в сердцы, о нем же ты глаголеши. А человеческаго ради страха последую противным словам новым. Аще и не сердцем, обаче повинуюся, но сие имам, яко и вам не враждую. Рече: Двоедушных Христос не приемлет, глаголет бо писание, исправите сердца ваша двоедушнии. Иже несть со Мною на Мя есть. И иже не собирает со Мною расточает, глаголет Господь [Мф. зач. 47]. Ты же внимай словеси Василиеву еже глаголет. како креститися подобает яко прияхом, а веровати яко крестихомся. Того бо ради церковь крещения еретическаго не приемлет, яко зле крестивыйся добре веровати не может. Рече: Аз добре крещен есмь, и добре сердцем верую. Но токмо в словах страха ради человеча претыкаюся, да не изгнан буду яко же и прочии. Рече: И аз вем яко ты добре крещен еси, в Духа Святаго Господа и Истиннаго. от крещения веру приял еси, тако верова, яко крещен еси. но почто от крещенных тобою царство Христово затворяеши? иже несть мощно веровати инако разве крещени суть, по словеси Великаго Василия. Рече: Аще и велик Василий, но обаче не Христос, и слово его велико есть, но не евангельско. противу Христа несть мощно отверсти уст. А святых слова в чем преступаем, а прощению сподобляемся. Рече: Убойся Бога человече что глаголеши, аще и не Христос Василий, но ученик есть Христов. Слушая вас Мене слушает, а отметаяйся вас Мене отметается, глаголет Господь. смело глаголеши на святых Божиих, боюся тебе да некако лестию укрываешися, римлянин еси верою. Рече: Несмь аз ни июдеянин ни еллин, ниже римлянин якоже глаголеши, но верую во Христа, и поклоняюся Христу. и верою словесем Христовым, яко христианин. сам ты убойся человече, якоже и мне глаголеши. Рече: Не озлобляйся возлюбленне. Всяк преступаяй и не пребывая во учении Христове, Бога не имать по писанию [Иоан. зач. 75]. Вы же явно от учения Христова отступаете, и Истиннаго Святаго Параклита отметающеся, и слово Христово преступающе. глаголете символ веры без истиннаго, и крещаете тако глаголя от лица крещаемаго трижды. яко без истиннаго, ему же несть мощно по крещении веровати во истиннаго, по словеси Великаго Василия, иже глаголет: креститися подобает яко прияхом, а веровати яко крестихомся. Зри умно от кого прияхом святую баню, или святый глагол по апостолу, не от Христа ли истиннаго Учителя. иже глаголет, яко Дух Истинный, иже от Отца исходит. Се есть вера наша. А о бани глаголет, шедше научите вся языки крестяще их во имя Отца и Сына и Святаго Духа. Кое лице от трех не истинно есть, рцы аще можеши. Рече: Мы не глаголем, яко не истинен есть, ниже глаголем яко не от Духа прияхом. но Василиево слово отчасти обличает вас, иже Христос глаголет во евангелии, яко Дух истинный, иже от Отца исходит. кто сие утаити может. но понеже глаголется у нас от премудрейших, яко святии отцы сего словеси, аще и Христос рече, в символе не прияша, и святыя веры исповедание без Истиннаго церкви предаша, и клятвами запретиша. И на то словеса вся наша надежда, еже держатися нам новых книг. Рече: Унее есть небу и земли пасти и скончатися, нежели учеником Христовым сущим святым отцем нашим преступати, своего им Господа Учителя слово, и не прияша в символ святыя веры Господа Истиннаго. Уста бо Господня нарекоша Того Истинным. Или мните яко святии отцы не ведяху, о сицевом страшном запрещении: яко всяк преступаяй и не пребываяй во учении Христове Бога не имать; или аще кто речет слово на Святый Дух не отпустится ему ни в сем веце ни в будущем. Вы же во обоих сих запрещениих страшных погрязосте: яко за преступление словеси Христова, Бога не имети вам. а за хуление на Святый Дух не имети прощения. Но и третие нечестие слукавствовасте хулно явным оболганием, еже глаголасте, яко святии не прияша в символ Истиннаго. о немже никтоже от человек воспомяну когда, разве нынешняго лукавства. Рече: Аще тако будет мощно восклонити пред Богом, наипаче же крестящимся без Истиннаго, яко глаголеши по словеси Великаго Василия, иже глаголет: креститися подобает яко прияхом, а веровати яко крестихомся. Обаче несть грех иже надлежит покаянию, и точию остает сумнительство крещенных без Истиннаго, по словеси Василиеву. яко всяк веровати должен, яко крещен. и от крещения вера Христова состоится в нас, пусти то на суд Божий. Рече: Воля ваша якоже хощете, тако и творите. Но вся елика аще будут разрешена на земли, будут разрешена и на небесех глаголет Господь. Прочеее умолчю, еже ты сам веси. яко страшно есть впасти в руце Бога живаго по апостолу. еже страшнее глаголет сам Господь, яко всяк иже рече едино слово на Святый Дух не отпустится ему ни в сем веце ни в будущем. Вы же всякое слово Христово, наипаче же о Святом Дусе, всегда глумлением проходите, небрегуще о страшных словесех Господних, иже глаголет: небо и земля мимо идет, а словеса Моя не мимо идут. всяк преступаяй, и не пребываяй во учении Христове, Бога не имать. Возлюбленный ученик Христов Иоанн Богослов, а не ин кто старец Иоанн, якоже рекосте в книгах ваших. Рече: Вся страшна и праведна воспомянул еси, и не возмогу противу стати ти. Не можеши ми дати терпения в гонениих, за сию истинную юже воспомянули. Аще ли ни, то да увеси, яко слабострастен есмь, и весма малодушен. Рече: Глумление не спасет нас, кто бы за ны умре. той даст нам и терпение в гонениих и страданиих. глаголет бо, аще бо опасное житие имать, да избудет всех сетей вражиих. кто Мне служит, Мне да последуют. идеже есмь Аз, ту и слуга Мой будет. В терпении бо вашем стяжите душа ваша, глаголет Господь. В терпении течем на предлежащий нам подвиг, взираующе на Началника вере, и Совершителя Господа нашего Исуса Христа. [/more]
Ответов - 0
полная версия страницы