Форум » Книжница » Спиридон Потемкин. Слово о кресте. » Ответить
Спиридон Потемкин. Слово о кресте.
САП: [more]Слово Спиридона Потемкина. О кресте Господа нашего Исуса Христа; и о крузе его яже предаша святии апостоли Божии церквам; и о Агнице непорочном Христе; и о Петрове кресте; и отступникове знамении, вся яже объявлена будет на дни сия. Понеже нужно рещи о истинной жертве и жребии, пренепорочнаго Агньца Христа, яже истинная и пренепорочная кровь Его, и тело от истиннаго и животворящаго креста Его. яко питавшася вси апостоли, и вси святии, иже богоугодно и праведно пожившии, после волнаго Его распятия яже на кресте, и по тридневном Его еже из мертвых воскресении, и по вознесении на небеса, яже послав от Отца Дух Святый, и теми утвердивый всю вселенную, и проповедавый вся концы евангелием царствие свое, и запечатлевый все мира концы. седьмию вселенскими соборы, и святыми отцы и преподобными, и всеми святыми, истинне вся преданная ими. Наипаче же Господу везде строящу, и слово исполняющу и чюдодействующу. пять тысящь мужей препитав пятию хлебы, и от толика народа два десять кошниц оставльшеся. яже прообразова Мелхиседек царь Салимский, изнесе Аврааму седмь хлебов, и от четырех стихий сотвореннаго Адама. И приточник глаголя, Премудрость созда себе храм, и утверди столп седмь, и закла своя рабы, сиречь жертвеная, и черпа в чаши своей вино, и уготова свою трапезу, седмочислием. Темже образом седмь просфир, во образ седми небес, и седмь веков, и седми церквей, и седьми таин церковных, и седми звезд, и седми светилников, и седми вселенских соборов, и седми дней. Поистинне приносится в церкви хлеб не прост, носит бо на себе знамение великаго Бога, яко престол царский, место Его свято, на немже пречистое стояние, имуще со страстьми изображено сицево [Изображен Голгофский четырехчастный крест с полной символикой в круге с надписание по кругу: «Се Агнец Божий вземляй всего мира грехи»]. Сице о святем крузе пишет святый Дионисий Ареопагитский: якоже бо круг не имат начала ни конца, такоже и Бог. Того ради глаголет Василий Великий, прежде приношения подобает в церкви приносити хлеб крестом животворящим знаменан, с непостижимом кругом, и в нем святый и непорочный Агнец. О немже толкуя глаголет Иоанн Златоустый на Благовестие Иоанна Богослова. Агнец бо есть Слово Божие, ядуща от главы и до ног. глава убо Божество, се воистину глава. нозе же плоть, се последнее. И паки о крузе, ибо на святых иконах пресвятыя Богородицы на главе, и у всех святых. пишетбося кругом сим являет венец нетления, яко раби суть непостижимаго Бога. То кольми паче о святей жертве разумети тайную трапезу Христову, о нейже апостолу вопиющу, да скажется церковию соборную и апостольскую. Юже такову тайну Исус Христос Сын Божий положи на земли. ейже первее служитель и апостол Ияков брат Божий, святей Божии и непорочней службе, яже самем Господем научим бе во Иеросалиме, по воскресении Его из мертвых, и иже по вознесении Его на небеса. Первии служители бысть апостоли и проповедницы, и утвердители всем Божиим тайнам, и всем Божиим церквам соединители, яко столпи необоримии и неподвижимии, и непоколебимии, предателие божественнии апостоли, и вси иже богоугодно пожившии святителии, и преподобнии отцы, иже упасше и соблюдающе веру нашу непоколебиму и неподвижиму, и непревратну, и нерушиму, и блюстителну, и незазорну, и соединителну веру нашу истинную христианскую. Якоже запечатленную святыми вселенскими седмию соборы. Такожде и церковь Божию блюстителну соблюдше непревратну и непреложну и соединену, Святым и животворящим Духом укреплену, яже предавше самовидцы Слову Божию, наставницы и учителие, и предателие тайнам Божиим. Яже на спасение роду христианскому, предавше блюстителну от рода в род века сего, и сохранну от запинателя рода христианскаго, и душегубителя антихриста, и гонителя и мучителя. И яже напоследок в последния роды збывшася, и ныне явственне суща гонителей и мучителей, а не учителей истинне, и апостольстей церкви, и вере христианской, яже истинне свидетельствует святая соборная и апостольская церковь, и их предания, яже в предателних книгах, вся явственне объявлена подробну, и укреплена святыми вселенскими соборы. А ныне братие поразумейте збывшееся в роде нашем, что ниже слышахом, ниже видехом яже творимая и принуждаемая, и яже мучащия Христавых ради таинств, и Сына Божия, и поклоняния иконнаго, сиречь креста щепотнаго. О, братие, откуду неначаемая беда и погибель взыде к нам, и потопляя нас. ово ласканием и учением неким, и принуждением, наипаче же мучением. Откуду буря зелная найде на нас, и потопляя нас, и повевая на нас ветром неприятным. И како ныне вера наша истинная апостольская и соборная церковь стала превратна, и преложна и подвижна и колеблема, и несодинена и не единствена, и не сохранена и не блюстителна. Такоже и крест Христов, яже писание свидетелствует в божественных книга, и крестные каноны явственне. крест животворящий светлее солнца осияя вси земнии концы, и досязая до небес, и прогоняя лукавыя духи. Сие великое знамение честнаго и животворящаго креста Господня, и тела Христова, сиречь Агньца Божия вземлющаго всего мира грехи. И о подножии креста Христова, подножие на враги, тому кланятися подобает. И пишет о том подножии в крестном каноне в седмой песни. Сила непобедимая, Христово подножие, победителство на враги. Что ино подножие враги побеждает, аще не сила святаго и спасеннаго креста Христова. Тому слава вовеки веком, Аминь. О кресте святаго славнаго и верьховнаго апостола Петра, подобает ведати [Изображен перевернутый трехчастный крест с нижней колодою в круге]. Сей крест святаго апостола Петра, в честь и в память от древних лет. Токмо на церквах имяху. Того ради святый Петр моли Нерона царя, да стремглав пропят будет, чтобы христиане знали крест Христов един. Ещеже посем показуя, яко от земли имать востати иная глава, иже вместо Христа прозовеся, приводя ко иной ложной главе, сиречь антихристовой. Ибо и ученицы его повелевают паче Христа веровати. о нихже глаголет святый Ипполит папа Римский, да и Кирил Иеросалимский. Иже на земли паче всех вознесется, блюдися. себо есть дух антихристов. Сего ради учащих и наставляющих себе пасущих, и высящихся нечестивых пастырей, чрева ради и домов украшенных, и риз многоценных; а не смиренный образ и целомудренный имущь и неблагодарный, яже бы достойно пастырем быти, и по истинне стадо паствити, якоже предавше Божии апостоли, святии отцы, и сами они божественное свое стадо соблюдше и сохранше, со всяким истинным поучением, непорочны и праведны; и ныне души их в неизреченней радости, на небеси выну прославляют Бога; а на земли в мире сем скоротлимом, телеса их неисповедимая чудодействия содевают, яже нами слышанная и видена быша. Егда Владыка наш истинный Спаситель роду человечю, посылая своя ученики и апостолы на вселенную на утвержение, глагола им: не нарицайтеся учители, ниже наставницы. Един бо есть наставник и учитель. И паки рече: востанут бо лжехристи, и лжепророцы, и дадят знамения велия. аще мощно прельстити и избранныя. Зрим ныне братие о том обуревании и гонении яже на соборную церковь Божию, и на истинную христианскую веру. И глаголет преподобный отец наш Ефрем Сирин [слово 110(105?)]. Не весте ли братие яко на самой громаде злобы стоим, и время люто есть, и близ есть соперника нашего антихристова слава. егоже виде Богослов восходяща зверя из моря, имуще глав седмь, рогов десять, на рогах десять венцов, и на главах его имена хулная. И паки видех ин зверь помощник последнему антихристу, восходящь из земли, имея два рога подобна агничим, сей по образу Иоанна Крестителя, егоже нарече Богослов за сокровенное в нем, перваго ради благочестия. При сем предотечи антихристове, дан есть дух образу зверину, перваго зверя, да проглаголет икона зверина. и иже кто не поклоняется иконе перваго зверя. то от втораго зверя предотечи смертию да умрет. Венцы же велии антихристу они прузи, иже лица человечи, власы женски, крыла орли, хобот змиев, во ошибех их главы аспидовы, а жала их яко жала скорьпии. Сии прузи духовнии поядают хлеб словесный вечнаго Живота. носят же лице человеческое, иже есть места апостольская, но не нрав. обличают их власы женьския. Сии бо сего суть гордаго века сладостнаго сынове. А не будущаго смиреннаго века. Но аще и простроша яко хобот учение, и летают взимаяся книгами, над сыньми противления, в погибающих подобных дровам, и сену и стеблию, истяжаша во области своей, яко во ошибах главы аспидныя, священников любящих лжю их. чтоже суть имена на главах антихристовых, хулы губящих вся и прельщая, в хуление Богу, хулити имя Его пресвятое воплощение есть скиния Божия, и вселение Его пресвятыя Богородицы, и покой Его иже есть Божиих раб святых. ибо призывает Сион Христос Бог, Иеросалиме Иеросалиме духовный, хощу тя собрати и избавити лова, яко кокош птенца под криле, а кто не похощет, се оставляю вам дом ваш пуст. будет же глаголет Господь последняя лесть горши первыя. Еще же глаголет от Марка: Иже бо аще соблазнит единою от малых сих верующих в Мя, добрее ему паче, аще обложен камень жерновный на выю его. и ввержен будет в море. понеже таинство беззакония имать быти, глаголет апостол, яко на сие нечестие от древле предустановленных, иже благодать и тайну великаго Бога и Спаса нашего Исуса Христа, прелагают во скверну, искупльшаго их Владыки кровию своею отметаются. и кратко речем, от них же бы имела церковь Божия озиратися светом проповеди евангельскаго учения и святых апостол, и отцов проповеди и утвержение, всегда бы непреложно и непревратно и сохранно. А ныне наипаче же от сих тма и прелесть и мрак и соблазн и скверны возниче, яко от адовых сокровищь, мраковидный дух. И ум их омрачися на святую соборную церковь, и на истинную христианскую веру, дунув усты их, и омрачися от поучения и утвержения их. не токмо простыя люди христианскаго рода, но и ученыя люди, наипаче же избранныя Божия, ово ласканием и учением, наипаче же томлением и смертию претящая. О, братие, поразумеем злохитрию их и прельщению. О слепоты, оле льсти, о дерзости и безумия, о падения злаго, оле прелести и погибели, толик имущ облежащ нас облак свидетелей. Богу вопиющу не токмо пророки в церкви к нам, но и апостолы. но и сам Спас провозвести на вселенную волны грядущия. Аз же козлище погибшее, яко аспид глухий душевныя уши затыкаю, света истиннаго не зрю, отлагаю солнца правды. Того ради от еретическия зимы озябаю, но да не прельстимся и не предадимся повелению и поучению их смерти душевней. Вся же сия быша и будет по попущению благаго Бога на всю вселенную. занеже умножися беззаконие сына погибельнаго и отступника антихриста. И ныне повсюду яве есть, и видится по всем градом, и во всяком месте в церквах Божиих, и внутрь олтарей святых таин лежит мерзость запустение, имеющь во дни сия, образ сицев [Изображен двучастный равносторонний крест в круге и подп. Iисъ Xсъ ника]. Ужас бо и страх вельми содержит мя возлюбленная братия. кто ли не восплачется, видя таковую мерзость запустение. како спасено имя Исус Христос, внутрь мертвого трупа положиша окаяннии лестьцы. сим хотят погасити, яко свещу семя веры верных. от истинныя главы Христа, ко оной ложной главе антихристу всех привлещи. и свести во дно адово в неисповедимыя муки. [Ниже: Изображено две кругловидные печати с крестами: четырехчастным и двучастным. Под четырехчастным писано:] Зрим ныне братие умершаго крестом Христовым. поверженный в подножии у честнаго и животворящаго креста сего. [Под двучастным:] Паки на кончину оживе глаголемая ника, еже есть победа истинныя христианския веры. Якоже древле изначала вниде завистником во змию, и прельсти змия Евву иногда, и победив и поругася прадеду нашему Адаму. И изгнану бывшу из неизреченныя славы рая. И у рая бывшу пламенному оружию твердо хранящу врата, и не дающу никому внити вонь. И от того времени яже от Адама вси праведнии праотцы и пророцы, иже богоугодно живущии мужие и жены, вхождение их было во ад, адова же враты входящих пространно приемлющи, а исходящих тверде основана, и укреплена врата медная, а вереи железныя, и прочее книги тому свидетельствуют. Егда же Господь наш Исус Христос истинный Бог наш плотию своею распяся на кресте истиннем, и животворящую кровь источи ис телеси своего. и от того времени даде нам грешным пресвятую плоть, и спасеную кровь, еже есть Агнец Божий вземляй всего мира грехи, тем животворящим крестом, и тем же честным крестом по востании своем еже из мертвых, разруши всесильное хранение адское, яже вереи железныя, и врата медныя сокруши, и до основания разлома, и всем адом потрясе, и вся яже быша в нем изведе из него праведныя своя, яже угодившая Ему ветхаго закона. И тем же животворящим крестом своим, отверзе врата царствия своего, и пламенное хранение само отступило от врат, не смея взирати на животворящий крест Христов, и не имать силу ктому врат хранити. Но о сем братие поразумеем и помыслим, силу и величество креста Христова. Такоже и ныне окаянная победа, сиречь сатана вниде в человеки лукавыя, и сказуют нам тму вместо света, а свет нарицают тмою. забыв реченное пророком: Горе глаголющим сладкое горко, а горкое сладко. Ибо и архангел Михаил егда пряшеся со диаволом, о Моисеове телеси, не смея суда хулна навести, но рече, да запретит тебе Господь. Сии же звезды прелестныя, и облацы безводнии от ветров преносимыи, якоже животнии по естеству, не ведят яже, хулят. осквернившии дух благодатный, имже тмы мрак вовеки блюдется, и титин показует, по Ипполитову, и по Богослову, 666. И кратко рещи, откуду Христос, оттуду и антихрист; откуду благочестие, оттуду и нечестие. Ребро же северово, аще и хвалится и тщится разорити град Христа великаго Царя Спасителя нашего. но в тяжестех его Бог наипаче знаем есть, ибо по тысящном лете Божия воплощения, развязан бысть сатана. [/more]
Ответов - 0
полная версия страницы