Форум » Книжница » Диакон Феодор. » Ответить
Диакон Феодор.
САП: [more]О богоотметнике Никоне достоверно свидетельство, иже бысть пастырь во овчей кожи, предотеча антихристов, яко церковь Божию раздра и вселенную всю возмути, и святых оболга и возненавиде, и кровопролития многа сотвори за истинную веру Христову правую. Богоотметничество же его сие есть кроме превращения церковных догмат: Егда бывшу тому змию лукавно на патриаршестве, келей-нику же бывшу у него взяту тогда, по нужди и не хотящу, святу мужу, Соловецкаго монастыря болничному келарю старцу Кирику, пришедшу ему из Анзерския пустыни. И той враг креста Христова удержа его окаянный у себе жити в патриархии. Во един убо от дней виде старец Кирик патриарши башмаки, бархатныя переда, и позре в них, и виде нашит на стелки крест Господа Ісуса Христа, на другой стелки вышито воплощение Пресвятыя Богородицы. И от страха того старец Кирик ужасеся, и от того часа преста ясти и пити. Враг же Христов Никон, вопро-шая его: чесо ради не яси и не пиеши? Он же, претворив себе в болезнь тяжку: не могу, рече, владыко зелне! И начат притужно проситися у него на обещанное место, да там гробу предан будет. И отпусти его скоро от себе и грамоту даде ему. Он же, пришед в монастырь, и поведа о том отцу своему духовному священноиноку Виталию о том страшном деле. А отец его Виталий и иным братиям духовным сказа в духовенстве о всем, како крест и воплощение в башмаках носит. И сей есть, враг Божий и богоотметник явной. И второй свидетель сему делу ученик его Никонов, старец Андреян именем, живши с ним и до патриаршества много лет. И виде тот старец у Никона в сапогах крест Христов и воплощение Пресвятыя Богородицы литы из меди тонцы. И той инок Андреян страх Христов имея в сердцы своем, и ужасеся зело, и возневавиде его, Никона, врага Божия, и начат ему пререковати во всем келейном послушании. О том же обличити его врага не смеяше. И многажды бияше его за пререкование, и разъярився нань и окова, и повеле его заточити в Палеостровской монастырь. Той же инок поведа отцу своему духовному Феодосию и иным многим, и Авва-куму протопопу с товарищи все поряду. Он же Никон, сосуд лукаваго диавола, мучил священноинока Нафана киевлянина, бывшаго у него уставщиком. И бывши у них распри о святом крещении, како отрицаются християне от сатаны и плюют нань. Никон же, поборая по отце своем сатане, глагола Нафану: не подобает плевати на сатану, — не знаючи де то у нас творят! Нафан же рече: подобает плевати на сатану, по отречении его; тако писано есть о сем во святых книгах. Никон глагола: не подобает! И много у них о сем бысть при. Нафан же ревности исполнися по Христе, рече: аз плюю и на того, кто и за сатану стоит! Никон же повеле бити его плетьми и в сылку сосла его на Кий остров. Он же сказа о сем подробну при мнозех. Он же, Никон, юродивых святых бешеными называл; и на иконе их лика и писати не велел той же Никон, о чем той же инок Нафан свидетельствова о сем, а иная нелепо про него и сказати. Он же хулил святых отец наших. Преподобнаго отца Іосифа Волоколамскаго чюдотворца Никон, враг Божий, злословил и зело поносил, и ябедником нарицал таковаго богослова, и не поклонялся ему. Преподобнаго же Евфросина лаял за пресвятую аллилуию, указавшу старцу Григорию Неронову. Егда же начал четверить, он же враг Божии, Никон, в то время про святаго Ефвросина о той аллилуии глалола: тот-де дурак безумной был! О сем старец Григорий Неронов сказа и царю вестно то дело было, в соборной церкви при властях. Да покрывает его царь, врага Божия, во всякой неправде, и в том ему судит Бог! И многих святых оболгал и ис поминовения в литии истребил. И все наругаяся творил и порочил. Сам же делне опорочен бысть и поруган от своих ласкателей и ученик. И яко пса изгнаша его земных ради, а не духовных, за землю и за вотчины, а не за Христа и за цер-ковь Его. И вси они своих си ищут, а не яже Христа Ісуса, по апостолу. Похищаяй бо той волк, Никон, яко разбойник грабя себе у святых монастырей села и вотчины, и у кня-зей такожде отъемля всяко и к своим прилагая. И многия князи ослезил, и монастыри оскорбил и разорил, и простых крестьян тяжкими труды умучил, созидаючи свой горкой Іеросалим. Добре рекл патриарх Іеросалимский о Никоне сице: когда-де руский патриарх начал строити новой Іеросалим, то скоро и бог новой будет на земли, сиречь антихрист! О сем сказа нам грек, именем Павел, и царю о сем вестно было. Но аще и пес изгнан бысть, но блевотина его и до днесь сладце полизоваема пребывает от любящих ту и не ведящих. А иже узаконоположил Никон нечестивыя догматы превращенныя, а прелщеннии от него паче утвердиша и держатся. Аще и разбойник не прав, но дело его право стало. Господь свесть помышления человеческая, яко суть суетна. Аще Никон наставник ваш правый путь вам показал и обрете веру, почто его изгнасте? когда ученицы на учителя ратуют? Аще Никон враг Богу, и Богородицы, и святым Его, и вам, то почто его прелестныя законы держите, и доколе храмлете на обе колена ваша? Аще есть Бог наш прав со святыми Его своими прежними пастыри нашими, идите за Ним и за святыми Его, святившими вас и отец ваших прежних. Аще же новый Ваал, Никон богоотметник, прав с новыми своими книгами, а старыми ересьми в новых догматех, то идите за ним, поклонитеся иконе его, написанной от его, и самого его не бесчестите. О, слепоты! О, лукавства! Где правда пастырская, и кто их буести и нечестия не посмеется! И царь его не узна пронырства вражия, вся его законоположения любовне держит, а отеческаго своего благочестия ненавидит и держащих благочестие гонит, и томит вся-кими озлобленьми и мучит. Прельщен бо зело от проклятаго отступника Никона, и от ученик его паче. Слыши небо и внуши земле глаголы раб Христовых! Вам засвидетельствуем всяку правду и всяку истинну, понеже праведнаго судию на земли не обретохом в человецех ныне, в последния дни века сего. Аминь.[/more]
Ответов - 3
САП: О вопрошении священнодиякона Феодора нечестивых властей. Ведомо вам буди, братие, и о сем, — вопрашивах аз нынешних властей темных века сего писа-нием руки своея: Скажите мне, честнии отцы, и научите в правду: когда вы глаголете исправляти веру и догматы церковныя правы нашли, а старая, якобы непотребны церкви, вон изнесли и смело глаголете, яко церковь Христова поблудила в церковных догматех, а Христос глаголет: церкви Моея врата адова не одолеют во веки, — и се явно стала, ваша ложь на церковь Христову. Да по словеси вашему буди так. То перво. Скажите же, аще вы мнитеся мудрее быти паче отец святых своих, что они уставиша, а вы все превращаете, а, называете исправлением свое отступление. И о сем научите мя воистинну и в правду. Разсудите, что Дух Святый глаголет во Откровении Богословле, глава 20: прииде ангел с небесе, имеяй ключ бездны, и ят змия, змию древнюю, иже есть сатана и диявол, и связа его на 1000 лет и в бездну вверже, дондеже скончается 1000 лет; и по сем паки подобает ему развязану быти на мало время, да лстит народы, на 4 углех земли. Скажите мне: для чего связан был сатана на 1000 лет? и что Христос в то время в цер-кви сотворил, покамест враг церкви лежал связан в бездне? и для чего развязан на мало время да льстит народы? и что виде Богослов, змия отторгша хоботом своим третию часть звезд небесных и вергша на землю? Скажите, что змий и хобот его, и что звезды его? Там же напи-сано [На поле: Апок. гл. 13]: имеяй ум да почтем число зверя, число бо человеческое есть, число его 666. Скажите, что зверь и что число его? И власти противу сих моих вопросов ни единаго слова не отвещали и по се время, заградишася хулная уста их, глаголющая неправду на церковь Христову. Или ложна и та тайны Духа Святаго мнят быти? А мы хотели им помраченным то утаенное от них писание открыти, благодатию Божиею данною своим его рабом. И егда, по отнятии священнаго сана, послаша нас заточити в темницы, тогда и дом мой отняша и запечаташа, и взята в дому в то время много святых писм, собраных от святых книг на отступников. Тут же были слова богомудраго старца Спиридония, на нихже противников церковных писаны небесною философиею, зело полезны церкви. Первое слово о святолепном изображении крестном святаго Мелетия патриарха Антиохийскаго. емуже начало: Арианом тогда хулящим. Второе слово на изметающих из символа истиннаго меч духовный, емуже начало: О христолюбцы, взыщите истинны Бога ради истиннаго. Третие слово вопросителное друг к другу о избрании святых и на прелагающих церковныя догматы, емуже начало: Суть ли между теми, иже видят. Четвертое страшноудивителная догмата всему исполнению церковному о связании сатаны и разрешении. Пятое слово ответное от лица протопопа Аввакума на послание Андрея Плещиева, емуже начало: Правду рекл еси, яко любовь иже по Христе. И противу всех сих словес богомудрых не отвещаша ни едина-го слова к нам, взявши их с себе: жестоко бо им противу рожну прати. Аминь.
САП: Вопрос некоего православнаго инока [Из сборника инока Авраамия: Христианоопасный Щит веры (глава 21)]. Повеждь ми, избранниче Божий, что Дух Святый глаголет во Откровении Богословле, глава 20: прииде ангел с небесе, имеяй ключь бездны и ят змия, змию древнюю, иже есть сатина и диявол, и связа его на 1000 лет, и в бездну вверже, дондеже скончается 1000 лет, и посем паки подобает ему развязану быти на мало время, да лстит народы, на 4-х углех земли. Скажи мне, для чего связан был сатана на 1000 лет и что Христос в то время в церкви сотворил, покамест враг цер-кви лежал в бездне, и для чего развязан на мало время да лстит народы, и что виде Богослов змия отторгша хоботом своим третию часть звезд небесных и вергша на землю; извести ми писанейцем независтно, егоже ради на муки дерзнеши и его же получити желаеши, истиннаго Христа Бога Спасителя нашего. И паки там написано: имеяй ум да почтет зверя, число бо человеческое есть, число его 666. Что зверь и что число его? О, честный отче, мужу желаний духовных! Толь еси великий словом, и делом, малоумнаго мя человека и не мала грешника о таких тайнах сокровенных Святаго Духа вопрошавши. Глубок, отче, вопрос твой; моего же разума противу того велика мелина. Вам дано есть разумети тайны царствия, нам же в притчах. И таковых ти достоит вопрошати о том, каковому и открыти то, преже нападшему на перси своего Учителя Хри-ста, и оттуду почерпшаго неизреченным тайны, заточену ему бывшу в Патме острове и уединену, и тамо Святым Духом озарену свыше. И како аз могу, отче, небесная тому откровения своим умом, по земли еще плежущем, разумети таковыя сокровенныя тайны, положенныя в церкви на прочитание верным, иже недреманно имут умное око, да сохранятся от всепагубнаго пришествия анти-христова, и его пестрообразныя прелести. К тому же еще крепко утеснен аз, ни книг святых имам у себе в заключении, наг от всяческих благ. И хотел бы мало тебе отвещати, попросив благодати от истиннаго Параклита: но ум мой присно во всяческих смущениих пребывает, и нимало на высоту небесную возлетает, но долу понича, зря множество своих зол. И уповаю на ваши отеческия молитвы, дерзну мал ответ вопрошению твоему сотворити, елико навыкох от Священных писаний, богомудрым мужем откровенных, да не со скрывшим талант своего госпо-дина прииму суд. Ангелу Божиему, емуже поручены суть ключи бездны от своего Творца, да свяжет сатану, а связа на 1000 лет, да не лстит ктому народы. Егда бо не связан был сатана до пришествия Христова, тогда всю вселенную привел во идолопоклонение, и самый язык избранный, еврейский, и пусту землю благочестия сотворил. Хри-стос же Сын Божий упразднил его прелесть пришествием своим на землю первым. И по связании сатанином тогда, и по Христове вознесении на не-беса, явишася святии мученицы, по Христе крови своя проливающия яко воды, и тою землю всю очистиша от идолобесия, и мир просветиша благочестием учения апостольскаго. А потом устрои Христос седмь вселенския соборы, на тех бо возвеличил кровь мучеников своих, и теми свя-тыми вселенскими соборы наполнил Христос цер-ковь свою святую догматы, с небеси в ню спущая. А все то строя Христос донележе враг церкви Христовы связан лежаше в бездне ту 1000 лет. И в ту бо тысящу лет непрестая ратоваше благочестие. Но не толико и еще и не сам собою, но духи своими лукавыми, посылая тех во свои сосуды, коих обретая себе, нечестивыя священники и епископы, митрополиты и патриархи, и папы и цари, и в них сея скверное семя свое, злыя и разныя ереси, хулы глаголя на Христа и на пречистую Матерь Его, и на единосущнаго Сыну Божию Духа Святаго хуля, и иконное поклонение отметая, дабы отнюд не славилося спасеное воплощение Христово. Но на всех на тех еретиков грянуша седмь громов гласы своими, и седмию светилники обличиша потаенныя волки, и в седмь труб на тех вострубиша, и душегубное тех учение потребиша, и самех вечному огню предаша. И сию тысящу лет нарече писание первым воскресением. Блажен бо, рече, и свят, иже имать часть в первом воскресении: на тех бо смерть вторая области не имать. Аще кто и ныне тоя дер-жится преданныя веры, имать часть в том первом воскресении с теми святыми, седмь крат собравшимися на вселенских соборех. И егда совершися тайна Божия, повеле Господь вострубити седмому Ангелу, и со Ангелом воструби вся все-ленная: проклят приложивый и проклят отъемляй от преданыя нам святая веры. И по скончании 1000 лет развязан бысть сатана от тем-ницы своея на мало время, да паки лстит народы. А мало время определяет ему писание быти, посем что близко суд Христов, и осуждену ему быти в век века. А ныне ему врагу попустил Господь лстити народ, грех ради наших, на всех четырех углех вселенныя: понеже зело умножися нечестие во всем мире. И егда, вскочив из бездны, отторже хоботом своим третию часть звезд небесных, и поверже их на землю. Змия разумети есть сатану, а хобота его папу римскаго, а звезды народы верных, небо твердь цер-ковная: ибо тогда сатана хвостом своим, папою еретиком, отторг третию часть вселенныя, римское царство со всею западною страною, от правыя веры християнския, и поверже их на землю, сиречь на земное мудрование, под ноги их себе сатана покорил и по них ходит, и волю свою в них творит, что хощет. Уже всякой отступник и еретик духовныя мудрости в себе не имать, юрод-ство бо ему, сиречь глупость, мнится. Но все плот-ская мудрствует, славно жити, и высоко глаголати. И посем что есть: имеяй ум да почтет число зверя, число бо человеческое есть, число его 666? Ох, ох, увы, отче, сего времяни исполнения! На нашу бо землю прииде сие зло. Егда исполнися 600 лет после римскаго падения, тогда Малыя России народи отступиша к римскому костелу от восточныя церкви Христовы. Егда же после того исполнилося 60 лет, тогдаж в великой России у нас велие смятение учинися також и отступление совершися: ибо вся непорочныя святыя книги из церкви опровергоша, и правыя догматы отринуша и святых отец, предавших я, оболгаша, новыя же книги, исполненныя многих ересей, в церкве внесоша, и лукавыя догматы, проклятое римское крещение и сложение трех перст (ибо не крестят Рим ныне) Фармосово и Арменское мудрование, и четвороличную аллилуию, римскаго костела мудрость, приемше, и вся сия оправдаша, и символ правый измениша, и нас, неотступльших от благочестия с ними, прокляша отступники. И по шти летех по шестидесятих, мню: совершенное антихристово мучение настало уже: понеже в коем благочестии стоял сам царь, и вси архиереи чему училися, и учили коей вере, и в ней воспитани быша сами и отцы отец их, за ту веру ныне кленут не-покоряющихся их прелести, и царскому другому суду отдают, и кровь християнскую вкупе проливают; и от кого было свет видети, и те ныне тмою сребролюбия омрачившеся, греческия, реку, вла-сти тут же благочестие повредити попустиша, сами преже еще повредишася; ибо преже в их землю вошли развращенными книги еретическия, и их смутили тем, — крещают, слышим, обливая, и Диоскорову ересь со Евтихием и единоволников держат, в трех перстах скрывая, и лгут на апостолов, будто от них так научени, а писания о том не покажут, и бородобритную ересь царя Констянтина Кавалина и папы Петра гугниваго держат, в церковь так ходят. А патриархи греческия в том не запрещают. А православныя архиереи за все то отлучали от церкви таковых, и проклинали противящихся церковному преданию; а ныне во всем благочестие нарушено бысть, и освященных апостол и богоносных отец правила нынешния власти, яко волцы твердую ограду, прескачут и дирою влазят во Христово стадо, а не дверию входят, — бывши попы в мире и постригшися, паки священствуют и архиерействуют. А отнюдь то святыми правилы отречено. А иныя сребром священство купят, паче же во Греции ныне, слышим, и патриархи тако творят, и друг по другом подкупаются. Егда Арсеней Суханов был в Цареграде, тогда четырех живых патриархов застал, а все цареградския. Оле, прелести сатанины! Когда бысть такая мерзость в церкви? Таковых ли нам ныне слушати, и нечестие такое переимати! И нынешния патриархи, зде пришедшия, Паисий и Макарий со престолов своих там они были скинуты, а в их место иныя, глаголют, по-ставлены. Сам их отступник Никон обличил посреди всего собора и при царе самом. А преже сего и сам на них ссылался, как церковь раздирал и лукавыя догматы вводил. Как золотыя им давал и соболи, тогда потакали по нем, что ни творил зло. Егда ж Никону времени не стало, тогда и извержению предаша его, за ту вину только судивше недостойна быти, что клятвою престол оставил, а потом паки вся архиерейская действовал, и в попы и во дияконы ставил; а которых он Никон ставил по отречении своем, тех ныне всех служить благословили. Какая то правда? — суди. Ставивый их извержен, а поставлени от него благословени! Лесть есть сие дело и человекоугодие; на лица зряще судят законопреступника закононопреступнии. По истине рещи, пастырие века сего волцы быша, и священнии лесть возлюбиша. А что, отче, и Ипполит святый пишет в слове своем о антихристе. В та, рече, времена будет злый вождь, агнец неправедный, титин (и то все ныне же сбывается, титин), тоже что 666, два тверда по триста — 600, наш — пятдесят, два иже по осми — 16. Вся сбышася божественная писания, и отступления, и чему по отступлении быть, то грядет. И Христова апостола Павла глагол исполнится: преже, рече, быти подобает отступлению, потом антихрист приидет [На поле: 2 Сол. зач. 275]. Виждь, отче, как предтечи его путь ему уготовляют богомерзкими догматы новов-водными и православных християн изгоняют, чтобы им не мешали. Той же апостол глаголет: егда бо рекут мир и утвержение, тогда абие внезапу нападет на них всегубителство [2 Сол. зач. 271]. Зри же ныне, како, истребивше истину Христову из церкви, и глаголют: ныне нам мир, и утвержение и соединение, яко прекословцев изгнахом и прокляхом, а веру добре исправихом. И таковыми пагубными словесы лстя себе, глаголют окаяннии. Все писание глаголет, что в последнее время везде отступят от веры, а не исправят веру. И сам Господь глаголет: егда приидет, рече, Сын человеческий обрящет ли веру свою на земли [Лук. зач. 88]. Вонмем Христову словеси. И о всем, отче, вышереченном чти Книгу о вере, главу 30. А кому паче нас открыет, о том написати. Мир ему буди, и нас о Христе вразумит. Аминь.
САП: О познании антихристовой прелести. Вопросил мя еси, возлюбленне, о нынешней но-воявленной прелести, наставшей по знаменанному числу лет вчиненных церкви святой чинов, утвержающейся в державе нашего Христианскаго царства, нареченнаго Бо-гом третиим Римом, и понудила есть святыня твоя мое недостоинство изрещи тебе от грубаго ми сердца боголюбезной твоей души. И аз грешный, воспящен многи-ми в себе помышлении, в велицем недоумении быв о сем: понеже вопрошение постиже мя выше силы моея. А на-ипаче удивительнее реку: како бо невещественная душа у вещелюбива человека благоразумию навыкнути хощет, и мудрозрительное око имея у помраченнаго тмою злострастия свет видети желает, и весьма несведящаго ничтоже благоразумие вопрошает! И не могох отложити любовь твою понуждаем есмь желанием твоим, презря свое всякое недостоинство и противление, дерзнух ти мало нечто воспомянути о предлежащей вине. Возлагая все свое недостоинство на пребогатыя щедроты Зиждите-ля моего, елико Он ми, Создатель мой, отверзет недостой-ная моя уста молитвами твоими вспомогающими, всяче-ски должен изрещи. Да не зазри, молю, скудоумию мое-му и немованию, да исправиши благоразсудством своим, да покрыеши: понеже нехотяща мя любовь твоя пону-дила к сему дерзнутию о настоящей прелести антихри-стова действа. Многообразна бо есть и всячески пестра, и колеблющая землю, и потрясающая вся основания церковная и потребляющая в души вся многоразличныя боговидения, и нужда нам о сем глаголати и всегда подтверждатися, яко да познавше прелесть истину удоб соб-людем, и неведяще же ю погрешим в истине. Антихрист бо он испадшая денница, зовомый диявол, темный и помраченный языческий бог, творец и зижди-тель всякия злобы, всякому благу противник. Попуще-нием Святаго Бога первое его ангельское сияние, еже име на небесех, дастся ему и первой его гордостный не-дуг попустится ему восприяти, богом ся наречет и возглаголет прегордая на Вышняго и святых Вышняго ос-корбит, и смирит смиренных и вознесет гордыя, и изблю-ет свою презлейшую мучительную горечь, яко да тем пречистый Владыка искусит весь мир, да явятся избраннии, и нечествующии да покажутся, рекше, да явятся овы в смерть, овы в живот, еже да сподобит нас Господь Бог избыти смерти и получити живот, неизреченных ради сво-их щедрот, молитвами Пречистыя своея Матере, Преблагословенныя Владычицы нашея Богородицы и Приснодевы Марии и всех святых. Аминь. Настоящая бо сия вражия прелесть, паче же рещи вкупе и злоба, прелукавнейши обретается римскаго по-мрачения, или тмы, понеже глава его тогда еще в смертном заколении бяше, рекше духовным оружием, от правоверных духовных отец отлучением верных, римское неистовство проклято. Ныне же, по исполнении имени его шестьсот шестидесяти шести лет, язва смерти его исцеле, сиречь во едину державу нечестия все три Рима совокупишася, по образу Августа кесаря. Первее по развязании своем диявол, изшед из бездны, Рим нечестием порази со всеми западными странами, и пошед до наше-го царства на пути Литву отступлением плени. Таже, по исполнении имени его, и наше российское царство нече-стием похити, и конечне воцарися всяким нечестием над всею вселенною, яко Август. И паки языческое богоненавидение яко терние процвете, паки по всей земле усадися мучительство не мнее прежняго, якоже до Христо-ва Рождества, наипаче, зельнее, — о сем чтый да разу-меет. И седе окаянный не в капищном храме, но в Божией церкви, на месте святем, не идолом возглагола, но богомерзкими еретичествы и многообразными отступны-ми иконами, некими трупы, мертвыми человеческими телесы, рекше нечестивыми людьми, к раззорению правды мучительством и богопротивством возглагола к своему нечестию покоряющих, и ими на поклонение себе приведе, непокоряющихся же смертию осуди избивати. И на севере угнездися, на возлюбленном своем месте, яже с небеси падшая денница, восходящая заутра. Рече бо треклятый себе во уме и взыде на святое церковное небо, и постави престол свой выше звезд небесных, святых цер-ковных учителей, и седе на высокой горе, благочестием светящейся, в христианском на севере царстве, в россий-ском государстве, и паки на горах высоких, в Божиих церквах, и на облацех небесных, на святой апостольской проповеди, подобием сравняя ся Вышнему. Егда еще беяше на небеси, помысли поставите себе престол на се-вере. Того ради Творец наш Господь Бог, ведая его злоковарство, яко тщится человеческий род весь погубити в смерть, предвозвести во оберегание избранным своим своими пророки хотящая быти на кончину времен, яко от севера лукавство изыдет; и ко верным глаголет: и соблюдутся от злых, лжа от севера изыдет на вся живущыя на земли, сиречь на вся мыслящая земная, и на небесех никоегоже блага помысла не имущая. И тако невидимый змий, проклятый диявол, входит во изобретенныя своя сосуды, во двоицу окаянных чело-век, царя и патриарха, и бывает нечистая троица, юже виде Богослов в трех нечистых духах — змия, и зверя и лживаго пророка. Ипполит же святый и прочие исповед-ницы Христовы истолковаша змия в диявола, зверя же в антихриста, сиречь царь лукавый, лживаго же проро-ка духовнаго чина начальника, рекше патриарха. И та-ко бывает троица пребеззаконная, Пресвятой Троице противница, и со изходящими из нея подобными себе треми же духи нечистыми, яко жабами, сиречь какову жабу, рекше хулу, змий, иже есть отец лжи, испустив на пренебеснаго истиннаго Отца света, такову же гадину злохуления отрыгну от всеядостнаго своего богомерзскаго сердца и зверь, антихрист, рекше сын беззаконный, на преблагословеннаго агнца Божия, Господа нашего Iсуса Христа; подобне же и третий злобесный лжепророк, иже есть дух лстечь, рекше патриарх, изблева от злаго своего сокровища сердечнаго хулу на истинный и Святый Дух. И тако в лепоту наречется совершенная троица пребеззаконная, пресвятей, истинней, пресовершенней, живоначальной Троице противница и святей вере раззорительница, еяже мрачнии поклонницы, окаяннии отступ-ницы отторгают истинных поклонников от истинныя святыя живоначальныя Троицы, ово многообразными том-лении и мучительствы, овоже многообразными лщении и злохитрыми ухищрении, еретическими прелестми, иже сплетоша, яко некую сеть, своему нечестию богомерзкую славу, на увязание и пагубу себе и прочим, по реченному: в сети своей увязе грешник, и теми прославляют отца своего, прельстившаго их, диявола, иже по изшествии из бездны глагола им живущим на земли и мыслящим зем-ная, а на небеси ничтоже имущим, сотворити образ зве-рю, сиречь отступление и зверообразное мучительство. И каков образом вепрь польский лют бывает к растер-занию плотскому, таковым же образом сотворити повеле диявол своим другом, окаянным еретиком, зверя, антихриста, сугубо убивательна, душу и тело, — душу ме-чем нечестия отлучающа от Бога, тело же мечем разлучающа от сея тленныя жизни. И тако образ зверя всяк помраченный тмою нечестия окаянный еретик носит в себе, зверину злобу изблевает на кроткое христианское стадо, от божественныя же руки и ограды овец приводяще к своему богомерскому уставу и нечестию. Нечестие же его удивительно реку за пестротное его и за лживое злохитрство, яко сплете нечестие с благоче-стием, клятву же с благословением, мучительство с щед-ротами, милость с немилосердием, кротость со зверством, безчиние с благочинием, здравое со вредящим, смертное с пребывающим, волка с агньцем, благословенное древо с проклятым, трисоставный с двучастным, церкви с ко-стелом, папежники со священники, западные с восточны-ми, ляхи с иподьяконы, поляки с причетники, мощи свя-тых с еретическими трупами, иконы святыя с богомерз-кими образы, и, скращенне рещи, каяждо бо святыня нечестивая близ себе имеет и сквернение, по образу пестраго зверя — рыся. Разделити же лицемерие от лукав-ства не мощно, понеже пестрота зверина по существу его сраслену имать в себе крепость и сплетено нечестие с благочестием носит. Антихрист бо есть диавол, ангел и бес, свет и тма, денница и прелестная звезда, лев и агнец, царь и мучи-тель, лжепророк и святитель, благ и гонитель, чисти-тель и сквернитель, пристанище и потопление, безбож-ным бог, християном же враг, миролюбцем святитель, боголюбцем же мучитель, нечествующим прибежище, благочестивым же пужалище, велик злобою и высок гордостию, страшен мучительством, пестр видением, осязанием же тма, сатана и человек, дух и плоть. И па-ки: змий и зверь и лжепророк, ихже виде Богослов. И в сих триех вся злоба нечестия состоится, и всякому бо хулению исполнение и всех злых совокупление. И вся си чины, и вся его держава и все его адово царство в сих содержится. И невозможно мне подробно исчести вся пестроты его: безчисленны бо суть и паче песка, понеже собраны со всея вселенныя соблазны и всех еретик скверны. И подобно кругам исходящим с дымом горким, нечестием, из гнезд своих, студенца, застужая вся благодеяния, из бездны нечестия, из глубины греховныя, омерцающия умную светлость, да не зрят солн-ца праведнаго — Христа и агры небесныя не смыслят. И лепо всячески о прелести сей со удивлением рещи: о, прелесте! понеже еси пестра, и кто может из руку твоею исторгнутися, иже в мирских вещех мятется и ум свой пригвожден имать? Воистину никтоже. Не аз бо глаголю, но божественный Мелетий о ослепившихся прелестию римлянех и полякох, и глагола верным, — егда еще не вся исполнися земля нечестием, тогда сия глагола. Ныне же, по исполнении языческаго нечестия, наипаче лепо рещи: О, прелесте! понеже еси пестра: зрим церкви стояща, церковныя же развращения всюду стояща. О, прелесте! понеже еси пестра: церковныя стены созидаются, законы же ея раззоряютея и злохульно укоряются. О, прелесте! понеже еси пестра: иконное поклонение почитается, образы же святые яко непотребны отметаются. О, прелесте! понеже еси пест-ра: причастие, Тело и Кровь Христову, исповедуют, тай-нодейства же ея еретичеством оглаголуют. О, прелесте! понеже еси пестра: правоверием нарицается, благовер-ные же побиваются. О, прелесте! понеже еси пестра: еретики проклинаются, благоверные же яко враги осу-ждаются. О, прелесте! понеже еси пестра: праздники святые празднуют, начальников же праздников рас-кольниками называют. О, прелесте! понеже еси пестра: мученикам Христовым память творят, веру же их пре-лестию нарицают. О, прелесте! понеже еси пестра: Евангелие прочитается, благовестие же тмою нарицается. О, прелесте! понеже еси пестра: идольскаго пок-лонения гнушаются, развращенные же образы яко свя-тые почитаются. О, прелесте! понеже еси пестра: церкви украшаются, иконы же святыя яко непотребныя из церкви износятся и в темныя хранилища затворяются. О, прелесте! понеже еси пестра: крест Христов трисоставный именуют, а почитателей его яко еретиков по-губляют. О, прелесте! понеже еси пестра: римское не-честие проклинаемо, странное же пропятие Христово на двух древах приемлемо. О, прелесте! Понеже еси пестра: треблаженное древо воспевается, крыж же ла-тинский яко истинный почитается. О, прелесте! Понеже еси пестра: попы поставляются, священники же яко враги сожигаются. О, прелесте! Понеже еси пестра: во святую Троицу глаголют веровати, правоверным же повелевают, глаголюще: проклените свою древнюю ересь, во что вы веровали! О, прелесте! Понеже еси пестра: знамением крестным знаменуются, истинное же таинство, согбение перстов, армянским нарицают. О, прелесте! Понеже еси пестра: Духа Святаго исповеду-ют быти, действа же Святаго Духа противнаго духа на-рицают! О, прелесте! Понеже еси пестра: крещают в Троицу, богословцев же Святыя Троицы яко безбожных огню предают. О, прелесте! Понеже еси пестра: Христо-ву воскресению глаголют праздновати, верующих же Христу и воскресению Его ехидным порождением нари-цают, окаянии! О, прелесте! Понеже еси пестра: апо-стольское хождение исповедают, проповедь же апо-стольскую содержащих пагубоглаголивыми волками блядословят, злии! О, прелесте! Понеже еси пестра: на восток глаголют обращатися, покланяющихся же Во-стоку востоком — истинному Свету-Христу западными нарицают, злострастнии! О, прелесте! Понеже еси пе-стра: диявол проклинается, змий же яко честный почи-тается. О, прелесте! Понеже еси пестра: крест тричастный на месте поставляется: крыж же двочастный в причастии полагается. О, прелесте! Понеже еси пестра: в одежды святительския облачаются, святителям же яко враги являются. О, прелесте! Понеже еси пестра: царскою багряницею облачаются, християном же яко мучители являются. О, прелесте! Понеже еси пестра: християнами нарицаются, християнские же законы дер-жащих арменами нарицают и яко врагов изгоняют. О, прелесте! Понеже еси пестра: врагов гнушаются, сквер-ные же поляки и богомерзские жиды, и с немцами не-честивые ярмяне и прочие безбожные языки яко благодеи приемлются и честию велиею почитаются. О, пре-лесте! Понеже еси пестра: монастыри устрояются и мо-нахи собираются, иноческое же жительство раззоряется и отвсюду иноки изгоняются. И сокращенно рещи: каяждо бо их злоба и присаду имать в себе некую зло-бу, да тем удобь привлечет враг нетрезвящиеся человеки и во всеконечную погибель, якоже и Господь рече: аще не трезвятся, и праведнии прелстятся. И в лепоту сия наречется прелесть и всячески соблазн. И конечне паки рещи: окаянная прелестем прелесть, пестра пестроумным, яко за истину почитают ю безумнии. И кто миролюбный может от руку нечестия исторгнутися, и умом помраченный вещелюбием от уз твоих отрешитися и на горы разума Божия бежати не хотящ? Воистину, никтоже. Видиши ли, возлюбленне, прелесть вражию? Зриши ли, боголюбче, злобу дияволю, како упестри различне и вооружил на церковь Божию, хотя погасити семя ве-ры в верных? Ведяще бо сие, да никтоже приступит к побежденным осужденникам, окаянным отступникам, прияти некую святыню — благословение, или освяще-ние, или миропомазание, причастие, или брак, вязание или грехов разрешение, и прочую которуюждо святы-ню, понеже имать прияти и присажденное им злое не-честие и ересь, якоже и Господь рече: от нечистаго кто очистится? Бог мира и любве да будет с тобою и да сокрушит ногами твоима всякаго врага и супостата, молитвами Богородицы и всех святых. Аминь. Имя писавшаго сие: от девятаго числа на пятое, от пятаго на семьдесятое, от семьдесятаго на четвертое и паки на семдесятое, от семдесятаго же на сотое, во славу Божию, певаемую во веки. Аминь.
полная версия страницы