Форум » Книжница » Послание страдальца Христова Авраамия к христолюбцу некоему, свидетельство о последнем времени. » Ответить
Послание страдальца Христова Авраамия к христолюбцу некоему, свидетельство о последнем времени.
САП: [more]По Евангелию — нужда приити соблазном, а в другом евангелисте — не возможно не приити соблазном. Не мимошедшее дело, но нужно, Богу сие надобное. Токмо горе тому, им же соблазн приходит. Того ради Бог попускает соблазны, да же избраннии будут, да же разжегутся, да же убелятся, да же искуснии явлени будут. Выпросил убо светлую Росию сатана, да же очервленит ю кровию мученическою. По апостолу, вся искушай и внимай лучшему. По истине лучше и всего честнейши, еже во благочестии быти, якоже апостол научи нас: едина вера, едино крещение, а прочия не суть веры, но ереси и раздоры. Понеже от тех не мощно Духа Святаго прияти, якоже и Феофан старец с несторияны причащашеся, и толико страшно показа ему ангел Господень, молитв ради святаго старца Кириака, яко вся еретики в смраде и тме, и огнем дышуще месте, и сказа, яко не токмо приобщающиися, но послушающии словес их, и паки прирек, аще и вся добродетели исправит человек, а в вере неправо верует, в то место приведени будут мучитися с еретики. Внимай прочее о никониянех воспомянути, глаголет бо Великий Василий: креститися подобает, яко прияхом, а веровати, якоже крестихомся. Зри противных никониян, яко они инако крещени, а иначе веруют. Мы же глаголем по сему небоявленному богослову: зле крестивыйся добре веровати не может. Подобает им сице ответ творити: егда избрали веру новую, то сново и крестится. Увы, увы, о горе, к плачю преклоняюся о сем глаголати, яко вси уклонишася от Бога Святаго и лестьцу вероваша, и, яко аспиды глухия, затыкающе уши своя — слышати не хотят истинны и воистину, по глаголющему, престала молитва от уст человеческих, и паки престает, понеже к лутьшей погибели приходит, и глаголет ли кто, како престала, зрите — поведает нам великий Златоуст: тем же сказую вам, никто же Духом Божиим глаголяй речет анафема Iсуса; таже и другое: Ісуса кто же рещи может Господа Iсуса, точию Духом Святым, и прочая. А по грамотическому разуму соуз, сиречь слово то различие именуется. Еже рещи Господь Іисус, то стало два имени — Несториева ересь проклятаго: он не убояся на два состава разделити Господа нашего Iсуса Христа. И внимай посему, како престала, якоже Ефрем Сирин глаголет: всяцем коварством кует, чтобы отнюдь во времена тыя имя Спасителево не именовалось. Нам же повелевают святии быти ратники именем Iсусовым. И ты, любимиче, не моги пременити: како ти исперва заповедано от отец, тако и содержи. Веси во исповедании веры, како поло-жено: и во единаго Господа Iсуса Христа Сына Божия. Такоже Златоуст великий свидетельствует молитву Ісусову творити и великий во отцех Іоанн, Лествицу списавый на небеса восход, н преподобный авва Дорофей, и прочее о сем множество свидетельства обрящеши во отеческих книгах, но зде невмещения ради престану. Друже, не моги в старых книгах ни единыя черты приложити, понеже зло воистинну сие, яко развращаяй догматы отеческия, таковый себе, по писанию, приводит ско-рую погибель. И о сем разумей: мудрствуют во своих книгах никонияне — слава Отцу, Сыну, и то Божеству слияние рекше составом божественным, и ересь сия проклятого Савелия еретика. И сложение перст, и пресвятую «аллилуию», и «Достойно» Пресвятей Богородице не мози преложити, и свидетельствует великий Златоуст в Маргарите: аще кто не исповедует Пресвятую Богородицу истинную, таковый от жидов ничим же различен и от язык неверных. Блюди же ся кова и лести бесовския, еже есть «веков», яко еретицы и сие малое слово тщатся преложити еже «вовеки веком». Глаголю же ти, яко ни малейшия чертицы не прелагай. А у Никона со ученики и единаго прилога просто не положено, но все на погибель верным. Что же есть время нынешнее вопрошаем святых отец наших, да поведают нам. Пер-вый возвещает нам великий Іоанн Богослов, апостольская красота: горе, горе, горе живущим на земли! О сем времени и Ефрем Сирин заповедает со слезами молитися, дабы сохраненым быти, и научает паки: егда противный явится, покоя не имут людие на земли, и уже отчасти глаголет икона зверина, и не покланяющихся ей языки режют, и огнем сожигают, и во гробы вверх ногами поставляют. И ты по сему плоду разумей Никона и его учеников, како не богопротивная и проклятая мудрствуют. Понеже Господь наш Iсус Христос от юга прииде, противник же от севера, такоже нам святая писания извествует — от севера быти пагубе, и тогда не токмо легкомыслении недоумеватися будут многокозненей прелести последней, но и избраннии многия прельститися имут, понеже зело глубока и пестра прелесть, якоже глаголет Ефрем: вложит тогда человеком противник страх и пренемогание в сердца, и люто неверствие. И тако в писании святых пишет — иже к Богу прибегая и святая писания почитая, ти познают прелесть его; а иже в вещех жития сего ум имущии и зем-ная любящии, тии не познают: аще и услышат слово, не имут веры. А иже нимало не имеют страха Божия, и отступят от истины, отнюдь не имей с таковыми совета, ниже любоприся с ними, понеже тлят обычаи благи советы злыя; отнюдь, молчи более и, аще прилучится о истинне глаголати, с великою хри-столюбивою кротостию глаголи. Ефрем Сирин в слове 82 глаголет: иже смиренную мудрость стяжа, подобен есть Христу; не смиреномудруя же — Христа есть чюжд. И апостол нас тако научи, яко рабу Божию не подобает сваритися, но кротку быти и со смирением противныя наказовати, но злое благим побеждати и пути Христову внимати, еже рече: Аз есмь путь. И тако нас святии научают. Инако спастися не возможно, токмо подобитися Богу, еже терпети осуждение, неосужден сый, и аще начал еси благое, проси от Бога, да поможет ти совершити, понеже просящему дается; и не ослабевай во благих, аще и наветы какия прилучатся. Пишет бо преподобный авва Дорофей во своей книзе, яко всяку добру делу искушение или да предъидет, или да последует. А еже рукою отнюдь не мози дерзнути на кого, правильная бо се вина — бия верна или неверна, иерей да извержется. Аще и тщета от кого прилучится, вмещай, и к Богу прибегай, прося помощи о терпении; по словеси Спасителеву, молися за творящих ти пакости, и брань наша токмо ко единому дияволу. По апостолу, несть наша брань к плоти и крови, но к воздушным духовом, рекше, к бесовом. Но токмо егда прилучится, любо не возможно уклонитися от врагов, и принуждати начнут отрещися истины и похулити Бога или образ Его пречистый, или Пречистыя Богородицы, или святых Божиих хулити, или образы их, то ни умолчи, но проповеждь истинну пред человеки, да небеси со ангелы ликовати сподобишися. Аще же кто отвержется пред человеки, отвержен будет от славы Божия и з бесы мучитися во веки безконечныя будет. У новых любителей будут иконы живопись латыньская и такия держать велят, а древния иконы хулити начнут и новым покланятися велят, и ты глаголи, яко мы в прелесть не веруем, но в соборную и апостольскую церковь, а се прелесть латыньская, и обратився на восток, поклонися, знаменався десною рукою. Тако нас научиша Афанасий Великий и преподобный Іоанн Дамаскин. О сем ти помянух, еже в разуме нынешнее время преходити, яко днии лукави суть. Доидоша и до нас, по апостолу, якоже пишет — собра во свое время сатана своя слуги и верных Христовых рабов погна грозою, а иных честию, иных прелестию, якоже капитоновы ученицы прельстились, еже Кирик на Плесе мне грешному поведа: сына его духовнаго звали в пустыню капитоновы ученицы, глаголюще: с нами де Христос, с небеси сходя, беседуя. Добре святии отцы нас научиша о сем сице: егда рекут прельстившиися — се в пустыни Христос или зде, или онде, и вы не исходите во след их от единыя истинный главы Господа нашего Ісуса Христа и от соборныя и апостольския церкви во их пустошныя глаголы, понеже пустыню глаголют святии отцы пустошныя их глаголы, и во прелести их житие пустыня наричет и нынешнюю прелесть. И мне грешному прилучилося со многими от них на словах быти и от многих верных слышах про них, и разсмотрих, яко в крайнюю прелесть доидоша, и в различныя ереси внидоша; а инии от них же сложение перст истинно воображают на лицах своих, тако же и молитву истинно творят, но, по апостолу, истинну в неправде держат и нечисте от рвения Христа проповедают. Прочее же, возлюбленный мой, реку ти последнее: аще кто не повинуется писанному святыми, рцы таковым — не мы худии, но да отвещает нам святый Исидор Пилусийский. Отвеща сице: аще не веруют святыми написанному, таковыи единем от двоих недугуют — или не веруют святыми написанному, или себе самех непщуют мудрейших быти Святаго Духа; и что иное, токмо беснуются. И послах я тебе послание пользы ради з братиею отца Аввакума, и ползуйся им, и прочих верных поль-зуй, развращенных же по первом и втором наказании отрицайся, по апостолу, и пред свиниями не сыпли бисер, да не попирают ногами. Аще кто речет, яко Аввакум самохвален, и такия грамотки пишет, ты же рцы против таковых, яко зле глаголете сия, но отец Аввакум воистину апостол Христов есть. Якоже рече Павел: мне подобни бывайте, якоже аз Христу, и глаголющему оному словеси внят Аввакум: Аз есмь путь, истина и путъ. И подобится воистину своим страданием апостольскому страданию и путем Христовым шествует, и повеленное от Бога верным возвещает, якоже и Симеону, но-вому богослову, по прошению его, Божий ответ, яко верным Моим тайны Моя открывай и возлюби их. И приглаголуй и сия таковым: оле безумия нашего и дерзости, како не устрашитеся в толику бездну себе погибели вринути, но сия ваша хула на рабов Божиих, чрез коих восходит на Бога, и аще не престанете от сего и не покаетеся, то со онеми часть и жребии приимете, глаголющими на Господа нашего Iсуса Христа: сей человек ядца и винопиица, и беса в себе имать. И не усумнися о сем, еже апостолами нынешних страстотерпцев нарицати, яко, по писанию, святых славнейши и вышши первых мучеников имут быти, и часть и престолы апостольския даны им будут. Ты же, любимиче, о сем не дивися, что никонияне нынешних страдалцев хулят, но веждь — великаго Предтечю Іоанна такоже поносили: сей человек ни яст, ни пиет, и беса в себе имать. Такожде Іоанна Лествичника велеречива и блядива нарицали, и много о сем образцов в писаниих святых. И паки о последних днех Христос рече: егда узрите мерзость запустения, стоящу на месте святом, и прочая. Мерзость запустения — разумей: не преподобное священство и прелесть анти-христова; на святом месте поставится — сиречь на олтари не пра-вославная служба, еже видим ныне збывшеся. Инаго уже отступления нигде не будет, везде бо бысть последнее Русии, и тако от часа сего на горшая происходит; будет обладаема царьми нечестивыми: тии бо суть рози антихристовы, и во время се ни царя, ни киязя, ни святителя православнаго несть. Един бысть православный царь на земли, и того, не внимающаго себе, увы, увы, западнии еретицы, яко облацы темнии нашедше, угасили християнское солнце росийское, и свели во тму многия прелести, и погрузили до конца, да не возникнет на истинный свой первый свет правды. О, горе бысть сие, возлюблении! Не явно ли антихристова личина показует свою прелесть? Да внимаем себе, сиречь отвсюду обзираем и с нечестивыми не мешаем себе, путь бо нечестивых погибнет; и развращеннаго их учения не послушаем, да не осудимся вечно от Христа и святых Его со отступниками и еретики, но бегаем от них и скрыем главу свою Христа, да не разлучимся с Ним вовеки веком, аминь.[/more]
Ответов - 0
полная версия страницы